باش آغریمی منی تانیمایاندا تانیر
هانسی دستمالا باغلییم بو آغرینی
بو تانینمامیش شهرتلی‌ آغرینی
سسین دوشور باشیما، شهرین!
کسیلمه میش سس‌دیر بو شهر
او شهر
هامیسیندان آغیرلاشیر یوخوسوزلوغوم
بوتون ...سوزلوغوم سیزلییم...
باغیشلایین خانم40درجه ایسسی‌ده حجاب چتین دیر؟!
اوندا چرقتیزی دستمال ائله باش آغریمی باغلاییم اونا
باشیمی؟یوخ اولماز باشیم باغلانمیر هئچ نه‌یه!
اصلا قوی بویوسون بو آغری، داغ اولسون-آغری داغ...
من باش آغریمی سسیندن تانییارام
الیمی سورتسم ده بئله تانییارام
5حیسسم‌له!آلتینجی سی‌لادا تانییارام
بئنیمین ایچینه آری دوشوب ائششک آری‌سی
وزززززززز-وززززززززززززز-وززززززززز
کسیلمه‌میش آغری‌دی باشیم
بؤیومه‌میش کسین باشیمی لوطفا
سیز نه قدر آغری‌لاریما بنزیرسیز نه نه!
اؤنجه گؤزلیدینیز ایندی اؤلوشگه‌ییب‌سینیز
سیزه سو وئرن یوخ؟!!
40درجه ایسسی‌ده حجاب چتین اولور؟!
ساغ اولون بیزیم گوناها دوشممه‌ییزمیز اوچون
دؤزورسوز بو ایسسیه
آما بیز یئنه‌ده دوشوروک
دؤشویوروک گوناها
آپ‌آغیر آغ‌آپ‌آغیر باشیم
وزززززززز-وززززززززززز-وزززززززززززز
سن بیر گولسن بئینیمده بیتیب‌سن
بیر آری قونوب اوستونه
صبریمی کسیب‌سن
بویویور آغریم
داغ اولاجاق-آغری داغ
یا ترکیه‌ده یا سنین سینن‌ده
چیخانمیاجاغام او داغا آدام اؤزونه چیخامماز
آدام اؤزوندن چیخامماز
داغ‌دا اؤزونه چیخاممازززززززز
وززززززز-وزززززز-وززززززز
سنی بئنیمه اکه‌نین اکیب دوغانین...
سن بیر گولسن بئنیمده اکیلیب سن
بیر آری قونوب اوستونه
ایل‌لردیر منی اکیب‌سن-صبریمی کسیب‌سن
گتیر بو سسی‌ده کسه‌ک
سیز نه قدر استامینوفنه بنزه ییرسیز!!
کسیلمه‌میش آغری‌دی باشیم
کسین لوطفن
من کیچیلیرم بؤیویور آغریم
من‌این چوخو باش آغری‌دی آزی من‌دیر
شهرتلی دیر بو باش آغریم
گئن‌دن گؤرن‌ده تانییار
منی تانیمایان‌دا
دستمالیزا ایلیشیب ‌دیر
سیلین منی دستمالیزدان
کسیلمه میش سس دیر /باش دیر/آغری دیر
باشیم باغلانمادی هئچ نه یه
بو شهر، او شهر
هامیسیندان آغیرلاشیر یوخوسوزلوغوم

بوتون ...سوزلوغوم سیزلییم

..